Matriek afskeidswoorde

Ek is bang om op die oomblik te blog. Dit wat ek sê, wil ek so graag hê moet opbouend vir ander mense wees, en hulle nie saam aftrek in die donker gat wat ek self nou moet deur nie.  Ek wou nie sommer vir die volgende week iets sê tot ek beter is nie. Maar ek het tog weer gedink om julle te misbruik. Ek moet vanaand by my dogter se matriekafskeid die opening waarneem. Ek doen dit as ‘n pa, maar ook as een van die gemeenskap se geestelike leiers. Ek deel sommer nou al my spiets met julle, dalk kan julle raad gee dat dit beter kan wees.  Ek wil so graag hierdie een keer iets moois vir die kinders saamgee vir hulle pad vorentoe.  Dalk beteken dit ook net iets vir iemand wat soms my blog lees. En as jy nie van preke hou op my blog nie, gaan kuier elders, dan is hierdie een vandag nie vir jou nie.

Opening by die Matriekafskeid van Hoërskool Bosveld Suid 2011

Vandag het ons kinders ‘n besondere mylpaal bereik. In ‘n sekere sin kom sê hulle tot siens na die twaalf jaar van skool. En nou lê die pad van die toekoms vir elkeen van julle en wag. You have reached the end of your years at school, and the future is eagerly anticipating your arrival.

Vanaand is een van die aande in jou ganse lewe wat jy op jou mooiste lyk ooit, en lyk julle nie pragtig nie! Julle lyk sommer gereed om hiervandaan diep spore te gaan trap in die toekomspad. You all look so beautiful and ready to take on the future!

As ‘n pa wil ek so graag vir julle vanaand drie dinge inpak in julle tassie vir die reis.

1. Onthou wie jy is. Remember who you are.

Jesaja 40: 31  Die Here is die ewige God, Skepper van die hele aarde. Hy word nie moeg nie, Hy raak nie afgemat nie, en sy insig is ondergrondelik. Hy gee die vermoeides krag. Hy versterk dié wat nie meer kan nie. Selfs jongmanne word moeg en raak afgemat, selfs manne in hulle fleur struikel en val. Maar dié wat op die Here vertrou, kry nuwe krag, hulle vlieg met arendsvlerke, hulle hardloop en word nie moeg nie, hulle loop, en raak nie afgemat nie…

But those who trust the Lord for help will find their strenght renewed. They will rise on wings like eagles, they will run and not get weary, they will walk and not grow weak…

Teks gedeelte- Psalm 121: Ek kyk op na die Berge, waarvandaan sal my hulp kom? My hulp kom van die Here wat hemel en aarde gemaak het. Hy sal nie toelaat dat jy struikel nie!

Wie is jy? Jy is iemand wat gemaak is om met arendsvlerke te vlieg, en voluit te lewe. Jy is geroep om ‘n wonderlike lewe te leef, omdat jy op die Here vertrou.

Who are you? You were born to fly on eagle’s wings, and live an exceptional life, because you choose to trust the Lord!

2. Onthou waar jy vandaan kom. Remember where you came from.

Psalm 139:13- “U het my gevorm, my aanmekaar geweef in die skoot van my moeder. Ek wil u loof, want U het my op wonderbaarlike wyse geskep… U het my al gesien toe ek nog ongebore was, al my lewensdae was in u boek opgeskrywe nog voor ek gebore is. Hoe wonderlik is U gedagtes vir my, o God, hoe magtig hulle almal! As ek hulle sou wou opnoem, hulle is meer as wat daar sand is, en as ek daarmee klaar is, sou ek nog steeds met U te doen hê.”

Waar kom jy vandaan? Die Here het oor jou gedroom. Die Here het jou kunstig in ‘n moeder se liggaam aanmekaar geweef. Die Here het vir jou ouers gegee, mense wat jou begelei het tot vandag. Hy het mense gebruik om jou te help vorm tot die mens wat jy vandag is. En Hy selfs stap die lewenspad saam met jou. Jy is volgende jaar op jou eie voete. Onthou wie jy is. Onthou waar jy vandaan kom. Wees dankbaar vir die Here wat jou gemaak het en steeds seën, onthou die ouers of voogde wat jou begelei het tot op hierdie punt in jou lewe.

Lord, you created every part of me, you put me together in my mother’s womb. I praise you because you are to be feared, all you do is strange and wonderful. … You saw me before I was born, the days alotted to me had all been recorded in your book, before any of them ever began…

3. Onthou waarheen jy op pad is. Remember where you are going to!

Julle het gedink dat julle al baie van die lewe geleer het. Die oomblik as jy uit die veilige ruimte van die skool en die ouerhuis uitstap, gaan jy skielik baie meer verantwoordelikhede hê. Jy gaan baie keuises in die lewe moet maak. En dit gaan jou nog baie meer laat groei, om die man of die vrou te word wat jy gemaak is om te wees. Onthou net hierdie woorde van Galasiërs 6: 4 “Laat elkeen sy eie doen en late ondersoek, as dit goed is, kan hy daarop trots wees sonder om dit met dié van ‘n ander te vergelyk. Elkeen sal rekenskap moet gee oor wat hy gedoen het…”

Jy gaan nou jou eie keuses begin maak. Jy alleen gaan verantwoordelik staan daarvoor. Die Here gaan jou nie met iemand anders vergelyk nie, Hy kyk hoe jy jou lewenswedloop hardloop. Waarheen is jy op pad? Ons kry elkeen wonderlike geleenthede om eendag voor die Vader se voete neer te lê, en te hoor dat ons goeie en getroue diensknegte was. Of nie. Mag jou doen en late goed wees, dat jy trots kan wees op jou lewe. Dit is jou keuse.

Galatians 6: 4- Each one should judge their own conduct. If it is good, , then he can be proud of what he himself has done, without having to compare it with what someone else has done. For everyone has to carry his own load… Do not deceive yourselves, no one makes a fool out of God. A person will reap exactly what he sows… ”

Conclusion

1. You were fearfully and wonderfully made by a loving God, to have an exceptional life. And God used people to form your life up till today- remember them. Onthou die Here het jou kosbaar gemaak, en mense gebruik om saam met jou die pad te stap.
2.   Die Here is altyd by jou om jou krag te gee en met arendsvlerke te laat vlieg. God is always with you to bless you, and give you the strenght to fly on eagle’s wings.
3.   You will receive a life full of opertunities, to live life to the fullest, in honour of God. You will not be compared to anyone else- the Lord wants to bless you to have your own, excellent journey!  Jy kry ‘n lewe vol geleenthede, waarin jy nie met iemand anders vergelyk word nie. Die Here stap met jou ‘n pad, en is daar om jou te seën, sodat jy ‘n uitnemende lewe tot sy eer kan leef.

Gaan vlieg nou met arendsvlerke die grootmenswêreld in!

Go Fly upon eagle’s wings into the future!

Mag die Here julle elkeen vashou, dra en seën

 

AMEN

Advertisements

Op soek na ‘n goeie moer!

Gister was maar ‘n dag wat ek verniet sal weggee as ek kon. Behalwe nou dat dit ook  jongste se verjaarsdag was, ek het die gesin toe maar Spur toe gevat dat ons twee groot pizzas gaan deel.  En KFC draairoomyse, waar Pastoriemoeder haar top behoorlik geblaas het oor die uiters stadige diens…

Gister, so net voor die groot hartseer, het ek en my tuiningenieur amper 2 ton se beesmis op ‘n plaas gaan haal. Ek is nie baie fiks met ‘n graaf nie, so dit was harde werk verby, en die Bosveld son is nou dodelik 12 uur die dag. En my sleepwa se deksel het ook toegeval, op my kop… die deksel het ‘n hele fietsraam op…

Met die oorvloediglike mis tot my beskikking het ek vanoggend maar by die koöperasie gaan kuier, soos enige goeie plattelandse dominee maar gereeld doen. Behalwe om met al die boere te staan en spekuleer oor wanneer die reën eendag gaan kom, en wat die vleispryse nou maak, het ek hulle groente afdeling gaan besoek.

My pastorie het morsdooie springhaassand. Alles wat jy wil hê plante moet groei mee, moet jy self vir hulle gee.  Ek het vroeër in die jaar my eerste tamaties reggekry, deur dit in 80 liter sakke te groei. En vanoggend het ek een van daai groot polistyreen saadbakkies gaan koop. Ek kry net nêrens klein saadkissies nie. Sal hierdie keer maar weer probeer om saad eers in kissies te laat ontkiem, en later uit te plant. Ek het ook ‘n paar eiervrug plantjies in seker so 15 liter sakke geplant, in ‘n mengsel van grond, kompos, mis en so bietjie landboukalk. In die polistyreen het ek tamatiesaad, blaarslaai en kool probeer plant. In die grond self sal ek, behalwe die boontjies wat reeds in is, ook spinasie probeer.

Ek sukkel net regtig met die groente besigheid. Daar is ouer omies wat dit so maklik laat lyk.

Ek sou so graag net organies ook wou probeer boer, maar hier is verskriklik baie peste en plae.

Ek wil ook aartappels probeer, maar sukkel om goeie moere in die hande te kry (is dit nie maar altyd die probleem nie…!)

Die hande in die grond kry vandag is maar my poging om my eie emosies op hok te probeer kry. Gister se selfmoord van my buurman, en more se matriekafskeid, en oormore se besigheid met Pastoriemoeder is maar oorweldigend,  ek val maar redelik gat oor kop rond op die oomblik.

Mag daar tog net hierdie keer bietjie groei wees…

Ek het vir die grap ook my CV Kaap toe gestuur… Net om my spanningsvlakke mooi hoog in die rooi te hou…

Wat ‘n deurmekaar dag en week, en maand… en jaar…

Ek hoop jou dag lyk baie beter, en dat jy iets lekker het om vandag jou lewe mee te geniet!

Soms is dit lekker om ‘n dominee te wees… (nie vir sensitiewe lesers nie…)

maar nie vandag nie.

Hierdie was veronderstel om ‘n baie spesiale dag in die gesin te wees, my jongste word vandag 11 jaar oud.

Gisteraand nooi ons vriende om ‘n pastei saam met ons te geniet. Net voor ons gaan eet, steek ‘n perdebyrige ding my waar my nek in my kopbeen ingaan. Dit brand soos vuur, en daar swel dadelik ‘n knop op. Ek het ‘n allergex gedrink. Maar van half twee vanoggend af het ek wakker gelê- die kop is seer, En my knie is ook vrek seer van gisteroggend af, die een wat ek met die fiets beseer het twee weke gelede.

Vanoggend na Bybelstudie stop ek by iemand, om hulle bakkie te leen. Ek en my tuiningenieur moes letterlik twee ton se mis gaan oplaai by ‘n boer vir my tuin. Met die min slaap, en die spanning van die groot strontstorie wat voorlê, voel ek nie te bright nie. By die huis is die vriend se meisie, wat gesels met ‘n ou dame. Ek groet en sê “Goeiemore! Elize, het Jan met jou gereël vir die sleutel?” Sy gaan haal hom. Kak die ou tannie my uit oor ek die dominee is, en haar nie groet nie. Ek sê: “Maar ek het mos…” Sê sy met soveel gif in haar stem: “Nee, jy het net gesê Goeiemore Elize…” Daar voel ek toe al klaar nie te lekker met die lewe nie.

Twee ton stront is swaar, sowaar!  In die oplaaiery het die sleepwa se deksel ook nog op my kop neergedonder, reg op die plek waar die perdeby my gesteek het! En hy is swaar met die fietsrak op…

Ek was doodmoeg toe ons alles uiteindelik op die bakkie en sleepwa opgelaai het, en weer by my huis afgelaai het. Ek het gaan stort, want ek het nie te wel vertoon nie.  En toe het ek jongste geneem, met die doel om vir hom koek en koffie te gaan koop. Stop gou by die koöperasie- daardie mis moet darem kos ook voorsien vir die maer jare wat nou voorlê.

Lui my selfoon. En ek antwoord. Ek haat party dae ‘n selfoon, want ‘n mens weet nooit wat vir jou lê en wag nie…

My buurman, ‘n gemeentelid, het homself in die begraafplaas geskiet vanoggend. Hy het ‘n pragtige vrou en twee baie mooi dogtertjies. Daar is nie huwelikspanning nie, en daar is nie finansiële nood wat ek van weet nie…

Ek was daar kort nadat sy vrou en kinders gehoor het hy is gevind… ek was daar toe sy ouers daar aankom en die nuus verneem het. Ek was daar toe familie een na die ander daar aankom, en die nuus hoor, en oorweldig word deur die seer.

En ek kan nie veel sê in oomblikke soos hierdie nie. Maar daar is so baie vrae!  Selfmoord is ook nie die Here se wil nie, en ‘n mens kan nie sê die Here het hom kom haal nie. Maar ek veroordeel ook glad nie, en sê allermins dat hy nou hel toe is, want dit is mos ook nie waar nie! Ek weet net hier kom ‘n baie lang, baie seer pad saam met ‘n baie seer gesin!

Behalwe vir die jongste se verjaarsdag was hierdie dag letterlik met stront gevul, en ek is nie vanaand orraait nie. Ek gaan nou maar vroeg slaap…

Die ongelooflike wonder van seks…

Nee, nie regtig nie, ek praat mos nie uit die slaapkamer uit nie. Wou net jou aandag hê en vir jou goeie more sê. Mag jy ‘n heerlike week hê en ten minste een van jou drome waar maak!

Ek gesels so oor die naweek met ‘n vriendin op die eposse, en sy haal ‘n paar sinnetjies van Neil Diamond aan.  En toe is dit ook een van my heel gunsteling liedjies van alle tye.

I’ve been this way before- Written by Neil Diamond

I’ve seen the light
And I’ve seen the flame
And I’ve been this way before
And I’m sure to be this way again
For I’ve been refused
And I’ve been regained
And I’ve seen your eyes before
And I’m sure to see your eyes again

For I’ve been released
And I’ve been regained
And I’ve sung my song before
And I’m sure to sing my song again

Some people got to laugh
Some people got to cry
Some people got to make it through
By never wondering why

Some people got to sing
Some people got to sigh
Some people never see the light
Until the day they die

But I’ve been released
And I’ve been regained
And I’ve been this way before
And I’m sure to be this way again

One more time again
Just one more time

 

Jy kan dit hier gaan kyk en luister… Kyk dit, dis asemrowend mooi!

 

HIerdie is mos die jaar wat ek woes dink oor my lewenspad. Die plekke waar ek al was, en nog graag heen wil gaan. Die mense wat ek nodig het om mens te wees. Reisgenote soos my liewe vrou, my kiddies, my suster, ou vriende, nuwe vriende…

Hierdie week se lewenspad is nogal woes. More verjaar my jongste. Donderdag is my dogter se matriekafskeid, en om een of ander rede slaan dit my hard- hoe kan my klein rooikoppie nou al klaarmaak met skool? Waar is die tyd heen?  Sy gaan so ongelooflik mooi lyk op haar matriekafskeid.  As ek nou al so voel, hoe op aarde gaan ek haar troudag eendag oorleef?

En Vrydagaand… sal Saterdag eers bekend gemaak kan word. Dis goed, maar dis erg vir my…

Ek voel baie melankolies vanoggend, en gaan vandag seker nie baie produktief wees nie.  Dalk meer tyd om vir ‘n paar ander mense se seer te bid, ‘n goeie boek te lees, my Bybelstudie oor Prediker 4 uit te werk, en hopelik met ‘n kollega met sy eie stuk seer te gaan koffie drink, en vir hom iets te beteken…

Ek gaan dalk net een keer hier verby, maar wil graag elke dag die lig sien… en aan ander uitdeel…

Dankbaar vir alles hier…

So loop ek my ou vriend Ysbeertjie weer vanoggend raak op litnet.  Hy is sommer weer bly om my te sien, en verseker my weer dat hy my blog baie geniet. Hy is net so effens ontsteld, want al wat hy by my raaklees, is net seks.  Toe het ek nou baie diep nagedink oor sy woorde.  Ek het besluit: my vriend die Ysbeer is reg… Ek is BAIE dankbaar oor seks.  Maar ek dink darem dat ek soms, net soms, dalk oor iets anders as seks ook skryf in my blog.

Ysbeer het my weer herinner aan die ou wat vir aanlegtoetse gegaan het. Die een wat die psigometriese toetse geneem het, wys vir hom sekere sketse (Roschach toets?)  Eers wys hy vir hom ‘n sirkel. Die ou sê dadelik dit herinner hom aan seks.  Die volgende is ‘n vierkant. Weer sê die kliënt dit herinner hom aan seks.  Die volgende skets is ‘n driehoek. ‘n Derde keer is die indrukke daarvan seks. Die psigometris is moedeloos, en vra die kliënt waarom dink hy die hele tyd net aan seks. “Nee”, sê die kliënt, “dis nie ek nie. Dis jy wat vir my sulke suggestiewe prentjies wys!”

As julle net seks in my blogs raaklees, is ek regtig jammer. Daar is een of twee ander dinge waaroor ek ook graag skryf. My motorfiets, om te spog met my luukse lewensstyl. Ek skryf nogal oor mense se situasies wat ek in my werk raakloop ook, en wat my diep aanraak. So nou en dan is my blog ‘n lekker plek om net te verwoord wat my diep geraak het, dat dit net uit my eie gestel ook kan uitkom…

Waaroor is ek diep dankbaar, en sou ek graag in my blog oor wou skryf?

1. Seks.  As dit nie vir seks was nie, was nie een van ons hier nie…  Dit is ook ‘n wonderlike gawe van die Here (sê die boek Hooglied, wat wel in my Bybel opgeteken is…) Dit is iets wat gegee is om geniet te word, volgens my oortuiging in ‘n vaste verhouding, waarin ‘n mens liggaam, siel en gees aan iemand anderste verbind word.  My oortuiging daarvan is dat dit in die huwelik hoort, en soms groot moeilikheid daarbuite maak…  Ek gun elke mens ‘n wonderlike sekslewe, want ek dink dit is deel van ‘n gesonde liggaamsbeeld…

2. Die Vrou: – is vir my die kroon van die Skepping. Ek is baie dankbaar oor vroue in my lewe. Ek dink die Here het die vrou pragtig gemaak, haar liggaam is een van die mooiste kunswerke in hierdie wêreld…  Ek kan ‘n mooi vrou waardeer, ek begeer net my eie vrou.

3. Verhoudinge: My gesin is vir my uiters kosbare mense, al verstaan ek nie elkeen elke oomblik nie. Eintlik verstaan ek byna nooit enige een nie… Maar dis lekker om deel van my gesin te wees, en te sien hoe elkeen ontwikkel in die lewe.  As gevolg van trolle se simpel kommentaar skryf ek nie altyd so gereeld oor hulle nie, maar ek is baie dankbaar vir my mense…

Verhoudinge met vriende is vir my baie belangrik, en ek het baie uiteenlopende vriende, wat baie verskillende dinge glo of nie glo nie…

4. Geloof- is vir my baie kosbaar. Ek verstaan nie alles nie. Ek weet net dat die Bybel sê dat die Here in die begin hemel en aarde geskape het, en dat dit prosesmatig gebeur het… As die son, maan en sterre eers op die vierde dag gemaak is, dan is dit mos tydperke wat beskryf word, nie 24 uur dae nie? My verstaan van Skepping sluit nie die wetenskap uit nie. Ek glo nie in ‘n 6000 jaar oue aarde nie, ek het ongelooflike waardering vir die grootheid van die Here se skepping wat in ligjare gemeet word.

Ek glo in ‘n God van liefde, wat kies om met mense in ‘n verhouding te lewe.  Ek glo dat Jesus my Here is. En ek glo in die lewe na die dood…  Daar is baie wat ek nie verstaan nie, maar dit wat ek wel weet, is vir my genoeg om te glo!

5.  Reis- ek wonder altyd wat agter die volgende horison lê. Daar is bitter min plekke in Suid-Afrika waar ek nog nie was nie, van Beitbrug tot Kaappunt, van Kaap Augulhus tot Bray, van Springbok tot Hazyview.  Ek ken die Oos-Kaap nie so goed nie, en wil graag baie meer van Transkei nog sien.   Verder sal ek eerder ou karre ry en soms op ‘n vliegtuig klim om na ander lande te gaan kyk- om met ‘n rugsak daar te reis en te eet waar die gewone mense eet, en in backpackers lodges en sulke plekke te bly om die land eerstehands te ervaar.

6. Koffieshops- dis vir my baie lekker om mense in koffieshops te ontmoet, dis nogal deel van my werk ook.  Dis lekker om met mense te gesels oor ‘n goeie koppie koffie, en Mugg & Beane is my gunsteling franchise. Tuis pleeg ek meestal Ricoffy, behalwe as Jacobs op ‘n groot spesiale aanbod is.

7. Motorfietse- baie lief vir rondry op die goed, trek op my 5e motorfiets in my lewe, die eerste vier was almal rondom 1982 model Hondas… Motorfietsrallies, breakfast runs… daar voel ek tuis. Motorfietsryers het baie meer ruimte vir mense wat anders dink as die gemiddelde populasie…

8. Lees- ek hou verskriklik baie van lees. Die blogs het nogal baie tyd gesteel by my lees van boeke. Met blogs, soos met boeke, moet ek meer begin kieskeurig raak wie ek lees… Ek het bv al Louis L’Amour se boeke op my rak, al is ek nou bietjie oor hom… begin nou wens vir ‘n kindle, want ek het nie meer plek vir al my boeke nie…

9. Kamp- ek besit ‘n ou (1982) Jurgens karavaan wat ek een keer per jaar gebruik op die gemeentekamp. Sou bitter graag meer wou gaan kamp, maar ‘n mens hardloop so vinnig uit geld uit. My karavaan is glad nie luuks nie, en lei aan houtvrot… Ek besit ook ‘n ou Choppertent, met ‘n ekstensie, wat ek in my sleepwa soms ver sleep (soos Morgan Baai) wanneer die karavaan die rit te duur sou maak…

10. Staptoere-  dit gebeur ook heeltemal te min, maar ek geniet dit baie om saam met vriende en familie so paar dae in die bosse in te verdwyn. Oos-Transvaal en Drakensberge is my gunsteling plekke… en SPANJE!

11. Fotografie- ek is baie lief vir fotos neem,  en was van kleins af.  Ek het vir Spanje ‘n Canon Powershot D10 gekoop, wat my regtig sover verbaas het. Verder het ek ‘n ou Canon 350D, eintlik die VSA model- die Rebel XT, wat ek op ebay goedkoop gekry het. Met ‘n 38-55 mm lens, ‘n 75-300 mm Tamronlens, en ‘n Canon 430 EX flitslig…  Ek hou baie van fotos kyk in mense se blogs, en is al van 1989 ingeteken op National Geographic, vir die fotos…

12. Musiek- enige iets van Bach tot Bon Jovi, hang af watter bui ek in is. Erens speel altyd musiek in my omgewing. My kinders kry dit nie reg om my met hulle musiek te irriteer nie, want ek hou ook daarvan- ek like ook Eminem en Rihanna, was ook hartseer oor Amy Winehouse… Tagtigs Rock is vir my steeds baie lekker, al het Rodney Seale gesê ons gaan hel toe daaroor…

13. Die lewe- ek is so dankbaar ek lewe nog na al die ongelukke wat ek al oorleef het- paar keer in motorfietsongelukke, een kop aan kop botsing oorleef, my bakkie verlede jaar gerol, van perde af- my perd het in ‘n gymkhana wedstryd al oor my gerol! Ek sal so graag die eerste man in ten minste drie geslagte wil wees wat my kleinkinders eendag sien…

14. Fietsry- sal nou weer begin fiks word vir Argus nommer 18. Ek is mal oor Chapmans Piek…

15. Vuurwapens. Nie om mense te skiet nie. Maar ek het in die weermag altyd my silwer skietbalkie met een of twee punte gemis, daardie dekselse oop visier as die teiken so draai op 50 meter! Ek kon op 300 m al my rondtes in die terroris se hand sit wat die AK vashou, dat jy dit met ‘n speelkaart kon toemaak. Ek het ook ‘n groot liefde vir praktiese pistoolskiet, maar doen dit nou al vir 15 jaar nie, vanweë die kostes… ons dorp het ook nie ‘n geskikte baan nie. Maar ek het steeds so 400 rondtes in 20 rondte magasyne vir my Browning, as ‘n trol graag wou kom kuier…

16. Sport kyk- moes heelwat hoër op hierdie lys gewees het, my gunsteling is natuurlik vroue strandvolleyball (‘n Olimpiese sport!) gevolg deur vroue gimnastiek, vroue ysskaats, vroue atletiek en swem. Ek hou van vroue!  Maar die Esybiesie is nie so lief daarvoor nie, en Supersport is ook heeltemal te laks daarmee. Dan: krieket, rugby, Formule 1, Moto GP, tennis in daardie volgorde…

17. Kosmaak! Ek hou verskriklik baie van kosmaak vir my vriende. Dis so lekker as mense aan my tafel sit, en geniet wat ek vir hulle gemaak het om te eet. Ek hou van kosprogramme op televisie, en wens ek kon verdere opleiding as chef kry…

18. Verder is ek baie geïnteresseerd in seks. Want ek is ‘n man…  (oeps, het ek dit al gesê?)

Oor hierdie goeters skryf ek graag. Maar sommiges sien net punt 1 en 18 raak.  Wonner waar lê die fout?

Die sterre in haar oë…

Die een ding wat ek baie geniet, is om mense te trou. En vir die volgende drie Saterdae is dit elke Saterdag se storie.

More se bruid ken ek vandat sy ‘n klein dogtertjie was.  Sy het ‘n pragtige vrou geword. Sy en haar geliefde loop nou al sewe jaar ‘n pad saam, en more is die dag…

Gisteraand toe ek van die Engeltjiefabriek af terugkom, het ons ‘n afspraak, om so vir oulaas oor die groot dag te gaan.

Daardie prentjie is pragtig- die troue is op ‘n Lodge buite ons dorp. En dit is ‘n buitelug troue. Maar die wolke pak saam…

Sy gaan aan die arm van haar pa in die gangetjie afgestap kom. Sy gaan bitterlik mooi lyk in haar bruidsrok, met haar swart hare, en haar oë gaan nog meer blink as gisteraand!  Voor by my gaan die bruidegom senuweeagtig staan en wag.  Hy gaan dalk sy oë nie glo dat sy wel opgedaag het vir hierdie ewige afspraak nie…  Hy gaan sy oë nie van haar kan afhou nie, soveel mooi wat na sy kant toe aangestap kom. Ek hoop hy gaan onthou om nuwe skoonpa se hand te skud, en dankie te sê vir die dogter, waarvoor Pa so bitterlik lief is.

Dan gaan hulle voor my kom staan. En ek gaan saam met hulle dink oor Geloof, en Hoop en Liefde. En die grootste van hierdie is die Liefde…

Hulle gaan in mekaar se oë kyk. Hy gaan vir haar belowe: “Voor God en ons familie, beloof ek liefde en trou, vir altyd, en in alle omstandighede, aan jou, my bruid…”  Sy stem gaan vashaak, die woorde wat hy gaan sê, is so ontsaglik groot… vir altyd… en in alle omstandighede…

Daarna gaan sy na hom kyk, en dieselfde aan hom belowe… “Voor God en ons familie, beloof ek liefde en trou, vir altyd, en in alle omstandighede, aan jou, my bruidegom…”   En daar gaan verseker ‘n traan oor haar wang rol…

Ek gaan vir hulle vra om mekaar die regterhand te gee. En daarmee sluit hulle die kontrak- hier is my hand, ek stap die res van my lewe saam met jou die pad…  Hulle gaan ringe aansteek wat dit vir die wêreld gaan sê: ek is verbind aan hom/ haar… Hulle twee gaan saam een kers aansteek, twee lewenspaaie word een. En dan gaan Josh Groban vir hulle sing: “You raise me up…” terwyl hulle diep in mekaar se oë kyk, mekaar nog ‘n soen gee, en hierdie oomblik vir altyd diep in die hart se kosbaarste plek wegbêre.  En ons gaan die diens afsluit met ek wat die seën van die Here oor hulle toebid, vir sy beskerming, sy Vaderliefde wat sorg, vir sy vreugde en vrede om in oorvloed in hulle lewens beskikbaar te wees…

Ek sien so uit na more!  Dis so lekker om ‘n bruid en ‘n bruidegom te sien wat werklik lief is vir mekaar, en die sterre in haar oë te sien as sy na hom kyk… Ek wens vir Z en M ‘n wonderlike lewenspad saam toe!

Ek sit net ook en wonder. Party mense beleef hierdie as een van die beste dinge wat ooit met hulle gebeur het. Van hierdie oomblik af groei hulle saam, al nader aan mekaar. Hulle dien mekaar met hulle menswees. Hulle eet die sakke sout saam op. Hulle lag saam, en soms huil hulle saam. Hulle baklei dat die vere waai, en dan maak hulle op met die heerlikste potjie liefdemaak daarna…  Hulle is mense saam op reis, en die verhouding maak hulle lewens beter as wat hulle ooit op hulle eie die lewe sou beleef…

Ek wens so dit kon waar wees van almal. EK hoop so dit is waar vir more se paartjie…

Dit breek my hart om soms met paartjies in my studeerkamer te sit, vir wie die sterre in haar oë weggeraak het…

Hulle is nie meer so mooi vir mekaar nie. Hulle begeer nie meer om in die ander een se arms te wees nie, soms gril hulle hulle dood vir die eens geliefde lyf…  Soms is iemand anderste se lyf baie meer pret as tuis… die steak by die huis is vervang met hamburgers en slap tjips by die sekretaresse… of die gym instrukteur wat so mooi kan luister na haar storie…

Soms het die passie verdwyn. Die lewe het ‘n alledaagse sleur geword… te lanklaas het hy vir haar ‘n bos blomme gebring en vir haar gesê hoe kosbaar haar liefde vir hom is. Te lanklaas het sy die kinders by maatjies laat slaap, en ‘n bottel vonkelwyn en geurige kerse in die bad met hom gedeel…

Ek is steeds ‘n sucker vir die liefde. Ek glo steeds dat dit die wonderlikste ervaring van die menslike bestaan is, dat daar iemand is om na uit te sien as ek tuis kom.  Ek is so bly oor daardie enkele voorbeelde van tagtig en negentigjarige egpare in my gemeente, wie se oë steeds sterretjies blink as hulle na mekaar kyk. Ek wonder net hoekom sien ‘n mens dit so min? Is dit net te veel harde werk?

More se bruid, mag jou oë nog net so blink as jy eendag negentig is, en mag more een van jou kosbaarste herinnerings ooit wees! More se bruidegom, sy is baie, baie spesiaal, moet haar nie gaan staan en opdonder nie!

Die wraak van die Vark

Gisteraand was nou ‘n vrye aand op die Lentekonferensie. Eers het ons by oom Gert se gat ‘n Zamalek gaan drink soos goeie studente mos maar maak.

Daarna moes ons self sorg vir aandete. In voortgaande studentetradisie gaan eet ek en kollega by Aandklas. Eerstens het die jong mede-eienaar amper op sy rug geval toe twee sulke “bejaarde persone” sy establishment instap. Ons het besluit op ‘n Spare Rib, aangesien ek al voorheen goeie ervarings met varke gehad het in Aandklas. Helaas is Spare Ribs besig om uit te fasseer van die menu af. Ons het ‘n hele ruk gewag, maar toe die ribbetjies aankom, was dit rou. Ek doen dit nie graag nie, maar rou vark is gevaarlik. Ons het dit teruggestuur om verder gaar te word.

Die jong eienaar het baie sleg daaroor gevoel, en vir ons ‘n klein peppermelt steak gestuur saam met die nou gaar ribbetjie. Hy het ook ‘n hele rukkie kom sit en gesels met die ou ooms… Baie gawe jong man, mag sy besigheid baie geslaagd wees! Ja, hy en sy vennote het ook ‘n tak in Skelmbos, en daar raas dit waarskynlik net so baie! Ek geniet dit egter baie so tussen studente.

Ons het daarna in Hatfield gaan fliek. Cowboys and Aliens was ons keuse vir die aand. Met james Bond en Indiana Jones in die hoofrolle, en Spielberg in die seilstoeltjie kan dit mos nie flop nie… Maar ek dink dis omtrent net Spielberg sou hierdie script laat werk! Dis absoluut ‘n ware verhaal, deeglik nagevors en ingebed in ‘n wilde weste konteks in die laat 1800’s. Die Aliens abduct ‘n paar mense, en steel die wêreld se goud. En dan skop James Bond en Indiana Jones mekaar se gatte, en dan saam die Aliens s’n. Besondere diepte, goeie karakterontwikkeling, en eindig met ‘n glimmer van hoop vir die tragiese held wat al sy girls langs die pad verloor.

Ek het lekker geëet en gefliek. Toe na Moeder se huis om fris en vars te wees vir Dag 3.
En nou die punt van die storie- daardie vark het wraak kom neem! Ek weet nie of dit die ouderdom is nie, maar ek moet nie meer vark in die aand eet nie. Ek slaap daarna baie sleg, met verskriklike nagmerries.

Party mense sê drome het groot betekenis. Maar ek weet nie wat sê gisteraand se droom dan vir my nie! Ek droom ek en Lance Armstrong is saam in sy vliegtuig, maar nie ‘n Learjet nie, nee, so kis ou Cessna 172. En Lance is die vlieënier, maar hy het glad nie skill nie, hy is dangerous! En ek het baie onveilig saam met hom gevoel- tot ek wakker skrik…

Wat maak ‘n mens van so ‘n droom? Ek kom net agter ek moenie meer nie…
Nou sit ek in die laaste lesing terwyl die Bokke opdraf teen Namibië! Wou net ten slotte sê Elize Morkel het my weggeblaas gister- uitstekend!

Nou ja, gaan geniet jou dag voluit, en pas op vir die varke!

‘n Dag in die Tuin van Kennis

Ag, ek het maar net ‘n mooi titel gesoek, Tukkies kan mos nooit so groot wees vir ‘n oud-Kovsie nie!

Ek sit met my eie ADD is ‘n klas oor Missionale Leierskap. En my gedagtes dwaal, en my vingers vroetel met die Blackberry.

Ek kom agter dat ek ouer word. Elke keer raak die manlike studente net meer en meer seuntjies. Maar die jonge dames!

Liewe ouers. Lente is ‘n pragtige tyd op die kampus. En as ek my oë ophef na die somersmodes vir dame studente, dan wil ek spontaan in ‘n lofgesang losbreek…

Ek glo dit weer vas vandag- die vrou is verseker die kroon van die Skepping. Ek persoonlik hou baie van die idee van ‘n Skeppingsverhaal. Daardie ontdekking dat ‘n man op sy eie ‘n boggerop is, die Here self het gesê dis nie goed om hom alleen te los nie. Daarom is daar uit die man iemand geskep wat hom waarlik volkome mens sal maak. Iemand soos hy, maar dank die Vader so anders as hy. Sy gelyke en die een wat hom help om mens te word.

Die vrou is vir my wonderlik! En mooi!

Ek hou soveel meer van hierdie verklaring as om te dink dat iets so edel sommer eendag uit die primordeal ooze gekruip het. Behalwe nou miskien wanneer ek die dag goed die hel in is vir my vrou!

Terwyl ek so in die akademiese atmosfeer is- een van die grootste debatte is tussen geloof en wetenskap. Die streep is getrek. Kies jou kant, want ons gaan baklei…

Wetenskap en godsdiens is aartsvyande. En op litnet word die stryd gestry deur jou opponent so sleg as moontlik te sê.

Een van die wonderlikste boeke wat ek ontdek het, het vir my so baie van my eie vrae geantwoord.

The Language of God deur Francis S Collins. Hy is ‘n uiters gerespekteerde wetenskaplike. Hy word die Vader van die Menslike Genoom genoem, die leier van die span wat die DNS struktuur van die mens uiteindelik vertaal het. Hy sal vir jou bewys dat evolusie verseker plaasvind.

Hy was ‘n ateis, wat die Here ontdek het in sy lewe. En wat hy in hierdie boek vir my kom sê het, is dat ‘n keuse nie nodig is nie. Jy kan altwee hê met integriteit. Die een sluit nie die ander uit nie.

Dit het verskriklik baie vir my beteken, want ek het ook Dawkins en Hitchens gelees. Collins bring “n stuk balans wat ek baie waardeer.

Waaroor gaan dit eintlik in hierdie blog? Die mens is die kroon van die Skepping, en die mooiste hiervan is die vrou! Sela!

‘n Dag by die Engeltjie fabriek

Dankie vir die omgee! Ja, pastoriemoeder se Corolla mag oud wees, maar sal nog die Kaap haal, veral met gister se nuwe bande en wielsporing…

Vanoggend het Theuns Eloff eerste lesing gehad en gepraat oor die tye waarin ons lewe en kerk in moet wees. Die man is skerp, ‘n mens kon hom amper vergewe vir die PUK se nonsens. Amper! Baie goeie spreker.

Ek het vanoggend na Nelus Niemandt geluister oor Missionale gemeentewees. Dalk verkeerde keuse, al die goed het ons lankal gehoor by die Vennootskap van Gestuurde Gemeentes.

Na middagete se hotdog het ek by Jan du Rand se werkswinkel ingehol. Hy is een van die wêreld se voorste kenners op Johannes en Openbaring. Ons het weer saamgedink oor 1 Johannes se boodskap vir ons identiteit. In my 1e jaar by hom klas gekry, en ons was skytbang vir hom. 25 jaar later is hy afgetree en ek middeljarig! Maar die prof is steeds baie skerp.

Die laaste sessie het ons by Louis Brittz en Renette Bouwer klas gekry. ‘N klassieke orreldosent, en ‘n kontemporere musikant wat verskillende kante van kerkmusiek vir ons belig het. Baie goeie sessie gewees!

Net voor aandete het ons ‘n heerlike verrassing gekry. Die spyseniers het vir ons ‘n heerlike wynplaas se wyne gereël en ek het twee goeie glase Cabernet gekry. Aandete was briljant met lekker skaapboud en hoenderpastye en daarna ‘n poeding met vla. Dit voel sommer of die kerk vandag weer omgee vir ons.

Vanaand het ek by ‘n goeie vriendin in Garsfontein gaan kuier, wat ‘n pragtige woonplekkie vir my dogter kan voorsien, 7 km weg van die kampus waar sy gekeur is. Deure gaan oop maar alles is dubbeld so duur soos wat ‘n staatsgesubsideerde universiteit sou wees- dit bly ‘n bekommernis maar al my gelowige vriende bly my verseker die Here sal voorsien. Ek moet seker maar nog baie leer oor geloof, en is nou self ingeskryf in die School of Hard Knocks. Vandag was ‘n goeie dag, tsv gisteraand se min slaap. Mooi aand daar by julle elkeen, ek is nou vakenmoeg!

Om diep te drink uit die fontein van die Wysheid

Geliefdes, hier kom nou ‘n week van ‘n anderste kaliber op my afgestorm…

Die slim manne van die Sinode het besluit dat ons moet bybly met die tye. Ons moet ‘n sekere aantal punte verwerf gedurende ‘n jaar, om ons “status as leraar” te behou.  ‘n Sekere aantal punte moet deurgaans gehandhaaf word, anders gaan hulle een Sondagoggend vir my gemeente kom vertel dat ek nie meer die Dominee van Bosveld Suid gemeente mag wees nie.

Die een ou probleempie is dat niemand nog ooit baie duidelik vir my stadige denke verduidelik het presies hoeveel punte ek op welke wyse moet probeer versamel nie…

So hierdie week is dit tyd om iets aan daardie groot mooi Zero op my balansstaat te doen, daar waar akademiese bevoegdheid en edele sedes van goeie inborste gekweek word.

Die Kerk het ‘n Lentekonferensie van more af in Gomorra. Vir drie dae gaan die dominees ontvlug van die ingroei toonnaels en ander aambeiverwante siekebesoeke, huisbesoeke (met ‘n “h”) sal agterweë gelaat word, niemand kan die dominee in die pastorie se spreekkamer kom spreek oor die teologiese “drivel” wat Sondag van die kansel af gebesig is nie- dominee is met die kerk se toestemming uitstedig…

Ons gaan more oggend inboek by die Universiteitsoord Studentekerk. Daar gaan ons vir drie dae diep drink uit die fonteine van wysheid.  Ons gaan hoor wat die nuutste op die mark in die teologiese wêreld is. Ons gaan met bewondering staar na die boekuitstallings, meestal in tale wat ek nie meer verstaan nie…  Ons gaan luister na ure se debatte oor teologiese identiteit. En julle sal die “juicy bits” daarvan in die Beeld kan volg, soos weergegee deur die getroue kerklike korrespondent- Neels Jackson.

Daar sal weer radikale uitsprake wees deur sekere Proffies, wat die goeie lidmate van die plattelandse kerk dik die moer in gaan maak.  Vir weke gaan ons Die Kerk weer verdedig in ons studeerkamers teenoor die ou ooms wat ook êrens Johan Heyns se dik Dogmatiekboek by Sheila se Book Exchange vir ‘n bargain gekoop het.

Ons moes inskryf vir sekere werkswinkels. Presensie word gehou, en punte word toegeken vir bywoning. Aangesien my punte nog redelik naby aan Zero is, sal ek dalk maar ‘n werkswinkel of twee moet bywoon…  Daar is een wat ek na uitsien- kerkmusiek by Louis Britzzzzz.  Ek wil net niks hoor van die inbrekers en ander misdade in hulle familie nie. Ook nie hoe die misdadiger met soveel liefde verwelkom word nie. Ek is ‘n aaklige mens, ek sou ‘n verkragter eerder met Temic wou vergewe, of met my 9 mm Browning wou spreek…

In die verlede, in my donker jeugjare, het ek Sinodesittings baie geniet. Dit was ‘n geleentheid om verskoning aan te teken, en dringend siekebesoek te gaan doen. As ‘n mens op die platteland bly, moes daar darem geleentheid ingeruim word om te gaan kyk hoe gesond is Sterland (15 jaar terug!) en die jong Menlyn sentrum.  Nou, met hierdie puntestorie, is dit nie meer so maklik om sommer net gou te gaan kyk wat is Ster Kinekor se opinie oor moderne teologie nie… daar is nie ‘n geakkrediteerde werkswinkel nie…  Ek sal seker wel weer een aand in Aandklas beland, hulle bier en steaks is die goedkoopste… Daardie luukse lewensstyl wyl ander net sojamince en toppers het om te eet…

Ek kon nog nie my hande lê op die akademiese gids wat presies vir my sal sê hoeveel punte ek moet verdien om Dominee Donkie te bly nie. Ek het al gerugte gehoor van dat ons iets soos 60 punte in ‘n twee jaar siklus moet verwerf.  Uit wat ek gehoor het, en wat ek maar self afgelei het, sal ek my 60 punte op die volgende skaal moet uitwerk:

Die Bileam se Donkie skaal vir Teologiese Akkreditasie vir Voortgesette Plattelandse Bediening in Die Kerk (2011 Weergawe)

Verdere Studie

•  Doktorale studie (volle 60 punte erkenning)
•  Meestersgraad studie (59.59 punte erkenning)
•  ‘n Drie dag werkswinkel oor ‘n goedgekeurde onderwerp (15 punte)
•  Inhandiging van ‘n werkstuk van nie minder as 15 A4 bladsye na ‘n werkswinkel (15 punte)
• Bewys gelewer van bywoning by die Sexpo- (40 punte)
• Bewys gelewer van ‘n oggend op Clifton se nommer 4 strand vir studiedoeleindes (10 punte)
• Publikasie van ‘n teologiese artikel (10 punte)
• As die publikase van die teologiese artikel oor Hooglied gaan (10 bonuspunte by die 10 punte)
•  Publisering van ‘n weblog soos hierdie (ten minste 30 punte, dis harde werk!)

Die Lentekonferensie

• Bywoning van die Lentekonferensie (15 punte)
•  Wakker bly in die Lentekonferensie (15 punte)
•  Geen flieke in werkswinkel tye bygewoon nie (-10 punte- swak benutting van tyd)
• Een fliek bygewoon in werkswinkeltyd (5 punte)
• Twee flieke bygewoon in werkswinkeltyd (10 punte)
• Drie flieke bygewoon in werkswinkeltyd (15 punte)
•  ‘n Fliek met Anthony Hopkins in ‘n hoofrol (2 bonuspunte)
• ‘n Fliek met Jolly Angelina in ‘n bikini in die hoofrol (10 bonuspunte)
• ‘n Fliek met Jolly Angelina sonder ‘n bikini in die hoofrol (15 bonuspunte)
•  ‘n Teologiese boek gekoop (5 punte)
•  Verslag gedoen oor die teologiese boek (5 punte)
• Verslag langer as halwe A4 folio (-10 punte- jou nerd!)
• ‘n Slim vraag aan die Teologiese Prof gevra (1 punt)
• Meer as drie vrae gevra tydens ‘n werkswinkel (-60 punte- ek haaat mense wat so baie van hulle eie stemme hou in werkswinkels! Bied volgende keer die ding aan, dan kan ek kies of ek na jou wil luister of nie, jou ****! )

Gemeentewerk

Daar is na bewering punte te kry vir lidmaatskap by goedgekeurde gimnasium soos die Aktiewe Maagd (is dit nie ‘n teenstrydigheid nie?) en ek is sommer die hel in- die kerk se skale bevoordeel die stadsdominees darem geweldig baie! Daar is nie iets soos ‘n aktiewe maagd op die platteland nie, hier is hulle nie eers passief nie!

• Om een aand se huisbesoek by vier huise te doen (2 punte)
•  Om een siekebesoek in Gomorra te gaan doen (5 punte, want ons kry nie ekstra reistoelaag daarvoor nie!)
• Om een moeilike ouderling te woord te staan (2 punte)
•  Om vir ‘n hele week vir niemand in die gemeente hardop “*** jou!” te sê nie (2 punte)
• Om ‘n motorfiets in werkende toestand te besit (15 punte per jaar)
•  Om jou kinders se skoolfonds klaar te betaal voor Kersfees (10 punte)
• Elke besoek met ‘n gemeentelid in ‘n koffieshop (1 punt)
•  Elke preek waarna nie 10 lidmate uit die kerk bedank nie (5 punte)
• Vir elke vriend wat nie ‘n Christen is nie (5 punte)
•  Vir elke 10 koeksisters op huisbesoek geëet (1 punt)

Ek glo ek sal wel by my 60 punte kan uitkom. Of elke liewe een van hulle wel deur die kerklike kanale erken gaan word, is nog onduidelik in my jong, onskuldige gemoed.

Indien julle kan dink aan verdere maniere om my te help om by daardie 60 punte uit te kom, laat weet gerus hier in die kommentaar. Ek sal seker nie op litnet kan blog hierdie week nie. Maar die Blackberry doen dit goed op WordPress, sal seker daar kan voortgaan om pêrels van wysheid te werp…

‘n Heerlike week word u allemal toegewens.

Hoogheilig die uwe,

Die Donkie.