Rooies se Briefie: Ewald Schmidt antwoord.

voorblad

Op Woensdag 19 Oktober is ek wakker geskud met die nuus dat ek op die voorblad van die Beeld is. Die storie- Ek het ‘n bier gekoop op die Wanderers. Wat dit nuuswaardig maak, was die geveg wat ‘n klompie mense wat ek glad nie ken nie, op my facebook profiel verlede week begin het.  Ek het gewonder waar kom hierdie aanval vandaan . Soos die meeste mense wat die berig gesien het, ook maar gewonder het waarom.

Die volgende brief wat wyd op die Internet versprei word, het uiteindelik ook by my uitgekom.

DOMINEE EWALD SCHMIDT – KRY JOU LEWE IN ORDE MET GOD!!

Ek reageer na aanleiding van die Ds wat met bier spog by Krieket en nadat hy aangespreek is – gou die sonde beskerm deur te sê, sy Uroloog het gesê hy moet bier drink. Die koerant berig dat Hansie Swanepoel, Johan Nel en Suzaan Goosen hom daaroor op Facebook geroskam het. Vandag staan ek trots en wil God prys. Dominee die drie Studeer vir leraars by School of fire en ek is tans die Hoof van School of fire. Kom ek gee gou hul agtergrond:

Hansie was ‘n daggaroker, hy het gesuip, sy pa het hom dood gedrink – toe bekeer Hansie en Dominee waar jy nou ‘n voorbeeld as godsman vir hom moet wees, is hy teleurgesteld.

Johan was aan cat verslaaf en het besighede verloor daardeur, sy pa was ook ‘n alkoholis en het homself doodgedrink. Hy het nou bekeer en hy verwag van ander bekeerdes om heilig te lewe.

Suzaane is op 10 jarige ouderdom deur ‘n dronklap verkrag, en het a.g.v drank slagoffer geword van gesinsgeweld. Suzaane het op volwasse ouderdom self haar vergryp aan drank en het nou Jesus gekies,

Dominee en ander christene daar is niks goeds in drank nie, draai na Jesus toe. Spog met Jesus nie met iets wat al baie hartseer vir ander veroorsaak het nie.

Nou gaan baie weer sê: Jesus het water in wyn verander. Vlg skrifte was dit TIROS- alkoholvrye wyn.

Ek self wou my seun van 2 weke doodskiet en my vrou, alles oor drank. Gesels gerus verder by my page daaroor.

Ons het ‘n bediening gestig Christian Front om Drank by Kerke, Aborsie, Human Trafficking en pornografie verspreiders te evangeliseer.

Rooies Strauss

School of fire

Christian Front

0827….

SHARE SOVÊR MOONTLIK

Dis mos net goeie maniere om ‘n brief te beantwoord, is dit nie?

Liewe Rooies Strauss

Ek het jou brief met opgewondenheid ontvang. Ek ken jou glad nie. Om die waarheid te sê, ek het nog nooit voorheen van jou gehoor nie. Tot nou.

Jy sien, ek het skielik op die voorblad van die Beeld beland en in die Burger en in die Volksblad. Selfs op Jacaranda het hulle oor my gesels.  Ek het glad nie geweet waar hierdie belangstelling vandaan kom nie. Tot iemand hierdie briwf van jou uiteindelik aan my ook gestuur het. Toe verstaan ek.

Ek het nou maar soos jy gemaak, en bietjie op jou facebook bladsye gaan kuier. Ek sien jy was by Koevoet. Heel toevallig het ek die afgelope ruk weer Arn Durand se boeke oor Koevoet gelees. Hy sê daar party van die seksies was nogal rof. Daar was van hulle wat nogal heel Bossies geraak het, en berug was vir Friendly Fire insidente. Was dit Zulu Zulu Mike wat so rof was? Was jy dalk in Zuku Zulu Mike gewees?  In elk geval, Koevoet het mos die meeste kills op die Grens gehad. Julle ouens het mos graag met die lyke van julle vyande op die modderskerms van julle Casspirs deur Oshakati se strate gejaag. En dan in die Oshakati International Guest House maar gaan kuier om die spoke te verjaag. Baie van julle ouens het erge Post Traumatiese Stress oorgehou. Julle was in die meeste kontakte van almal, ek sien Frans Conradie het 100 confirmed kills gehad.  Ek het sommer baie respek vir julle ouens. Julle almal het gevolunteer vir Koevoet. Dit was julle keuse. Dit verklaar insidente waarin julle later vanweë Post Traumatieae Stress regtig slegte dinge beleef het, ook in julle gesinne.

Maar dit lyk of jy met die genade van die Here weer jou lewe bymekaar gekry het. Jy het die spoke oorwin, en jy beteken baie vir ander wat ook deur slegte tye gegaan het. Ek respekteer dit baie. En ek is dankbaar dat die Here deur jou bediening vir mense soos Suzanne en Hansie en Johan en die res van jou span nuwe lewe gegee het. ‘n Kans om heel te word. Die genade van die Heee is darem net wondeelik, is dit nie?

Nou my vraag. Waarom stel jy hulle dan so bloot deur na die koerante toe te hardloop?  Ek sien van jou volgelinge sê ek het dit daar aangegee. Waarom sou ek dit doen? Wat het ek om te baat deue sulke negatiewe publisiteit?  Moet sê, jou aanval het my onberekenbare skade gedoen. Dit het my gesin baie seer gemaak. Dis nogal regtig nie lekker dat ‘n mens se ma op haar verjaardag haar seun op ‘n paal voor die ouetehuis sien nie. Daar op die Beeld se plakkate in Pretoria se strate. Tot in Kaapstad in die Burger! Rooies, dis nie nregverdig nie. Net soos wat jou Friendly Fire briefie op al jou baie faceboek profiele laag en gemeen is.

JY is tog baie beter as dit? Jy het dan so ‘n groot getal volgelinge, waarom kies jy om so vuil te speel?

Om jou te antwoord op jou brief: Baie dankie dat jy en jou volgelinge bid dat ek my saak met die Here regmaak. Ek aanvaar julle gebede met liefde. Ek wil graag so naby as moontlik aan die Here lewe.

Oor die volgelinge by name: jammer Hansie en Suzanne en Johan- julle het seergekry deur julle leier se slegte raad. Dis nie my styl om mense seer te maak nie. Julle het op my facebook profiel kom inmeng en my voor my gesin kom aanval.  Het julle die reaksie gesien van die mense wat my wel persoonlik ken? Het jule gesien hoe die publiek reageer nadat julle hierdie saak pers toe gevat het? Ek wil julle aanmoedig: dien die Here voluit. Moenie dat hierdie julle afsit nie- julle het al so ver met die Here se genade gekom. Volhard op die goeie pad. Ek is regtig jammer oor die seer wat julle beleef het.

Maar Rooies- jy aanvaar verantwoordelikheid in hierdie brief. Jy vorm mense met jou leierskap. Jy het ‘n groot invloed. Doen dan ten minste die moeite om erns met die Woord van die Here te maak. Jy mag nie die Here se Woord so buig soos dit jou pas nie. Daai storie van Tinos vir wyn: waar kom jy daaraan? Watter geskrifte lees jy? Die erkende Griekse teks waarmee omtrent  al die kerke van die wêreld werk met die Nuwe Testament, is die Nestle Alland teks. Ek ken hom goed. EK het dan vier jaar gevat om Grieks 1 deur te kom.. net bv Johannes 2: 9 en 10- die woord wat daar gebruik word is “oinos”. Wyn.

Kyk net hier Rooies ὡς δὲ ἐγεύσατο ὁ ἀρχιτρίκλινος τὸ ὕδωρ οἶνον γεγενημένον, καὶ οὐκ ᾔδει πόθεν ἐστίν, οἱ δὲ διάκονοι ᾔδεισαν οἱ ἠντληκότες τὸ ὕδωρ, φωνεῖ τὸν νυμφίον ὁ ἀρχιτρίκλινος καὶ λέγει αὐτῷ Πᾶς ἄνθρωπος πρῶτον τὸν καλὸν οἶνον τίθησιν, καὶ ὅταν μεθυσθῶσιν τὸν ἐλάσσω· σὺ τετήρηκας τὸν καλὸν οἶνον ἕως ἄρτι.

Dis wat daar staan. Sien: οἶνον. Gaan kyk gerus vir ‘n vertaling by http://biblehub.com/text/john/2-9.htm  En die Oinos (wyn) se Strongs nommer is 3631, as jy weet wat dit beteken. http://biblehub.com/greek/3631.htm
My ou vragie aan jou: dis antieke Israel in die Midde Ooste. Die druiwe word terselfdertyd ryp. Dit word in die parskuip  getrap tot druiwesap. Daar is nie stainless steel houers en moderne verkoelingsgeriewe nie. Dit word in klipkanne of kleipotte gestoor. Na 3 dae begin dit vanself gis. Wat woed van gegiste druiwesap? Oinos, broer. Wyn.

Ek gaan nie met jou in twisgesprekke gaan oor al hierdie teksverse wat jy en jou volgelinge na my kant toe gegooi het nie. Ek verstaan waar julle vandaan kom, en ek kry dit dat julle nooit weer iets met drank te doen wil hê nie. Die Here lei julle anders, en ek respekteer dit. Ek gaan nie verder oor hierdie punt iets sê nie, net vra hoekom julle ander se hantering van die Bybel so bevraagteken, as julle self vat en los en bysit en weglaat soos dit julle storie pas?

Maar om my op grond van ‘n bier so uit te haal, is nie regverdig nie. Julle het hierdie ‘n openbare twis gemaak. En ek haat dit. Lees bietjie mooi al die reaksies op die facebook groepe van bv Beeld en Jacaranda Mense kan nie glo dat julle so optree nie. Julle byt en verskeur. My gesin het baie seer gekry hierdeur.

Gaan lees gerus weer Romeine 14. Daar is baie ruimte om oor eties- morele kwessies te verskil. Maar moenie die liefdesgebod oortree nie. Jesus het gesê deur ons liefde vir mekaar as medegelowiges sal die wêreld weet dat Hy die Here is. Niemand word in die hemel in geoordeel nie. Rooies, jou manier van doen in hierdie geval was leifdeloos en agterbaks. En die mense het dit raakgesien.

Ten slotte: ek gaan nie eers begin redeneer oor bier en nierstene nie. Jy het geen mediese opleiding nie, behalwe as jy dalk ‘n opsmedic was. Weet jy hoe voel ‘n niersteen? Ek was ‘n maand terug in die Wilgers hospitaal met ene. Rooies, dis seerder as kraam. So: as my urine weer donker word, en dit begin bloederig raak, raai vir wie gaan ek luister as ek moet kies tussen jou en my uroloog se raad?

So ten slotte: ek het sover ek weet almal op my facebook delete wat jou as vriend het. Dit maak seer, ek moes selfs ‘n klasmaat delete. Maar jou mense het kom spioeneer en aanval, en my gesin seergemaak. My gesin pleit eintlik dat ek facebook heeltemal delete.

Ek het nie kwade gevoelens nie- gaan julle in vrede julle gang. Maar los my uit asseblief. Ek het my plek in die Koninkryk van  die Here, en julle het die reaksies gesien van die mense wat my ken. As julle wil aanhou bid vir my, doen dit gerus. Ek wil baie graag nader aan die Here lewe.  As julle wil aanhou oordeel, kla my voor die Here aan in julle gebede. Maar weet dat ek ook daagliks vir die Here vra om my in al my besluite te lei. Onthou Romeine 14 se vraag: Wie is jy om oor ‘n ander se dienskneg te oordeel?

Ek wil baie dankie sê vir die honderde mense wat my en my gesin hierdie week ondersteun en gedra het. Ek het ernstig vir die Here die afgelope ruk voor hierdie insident gevra of ek ooit iets regkry in  sy Koninkryk. Op ‘n baie vreemde manier het die Here geantwoord.

Ek is net spyt dat ek die voorblad van die koerant gehaal het oor ‘n bier, en nie oor ‘n wonderlike getuienis van hoe Jesus stukkende mense heel maak nie. Dalk kry Rooies dit beter reg as ek, en ek gun hom dit van harte. .

O ja, en die mense wat sulke goed soos Rooies se brief sommer net aanstuur en veroordeel… onthou die 9e gebod.

EN daarmee het ek hierdie gesprek afgehandel. Ek beweeg aan. Ek gaan nie met die koerante of radio of Huisgenoot daaroor praat nie. Ek gaan aan met my lewe en my bediening. Terwyl ek vashou aan wat die Here vir my gegee het in Prediker 9:7 :

“7Eet dus jou brood met vreugde, drink jou wyn met ‘n bly gemoed; God het lankal reeds goedgekeur wat jy doen.” Met die Vrug van die Heilige Gees van Selfbeheersing toegepas, soos dit hoort…

 

Vergewe al die spelfoute, hierdie is op my tablet in die donker getik, terwyl dit uiteindelik reën in die Bosveld. God is goed!

Die Engel word gesoek vir Die Burg…

So nou en dan wonder ek of die Here my nie vergeet het waar ek nou is nie…

Dan slaan ek my oë op na die Heilige Bode, om soms maar weer moedeloos toe te maak.

Soos hierdie merkwaardige advertensie wat in die jongste Kerkbode geplaas is. Wat maak my moedeloos daarvan? Ek kan nie aan ‘n enkele gawe dink wat in die kerk teenwoordig is, wat nie deur hierdie gemeente in een mens vir een salaris gesoek word in biddende afhanklikheid nie…

Net so uit die Kerkbode gehaal, net adres en dorp verswyg… Kyk bietjie wat moet hierdie een mens alles kan doen…

NG GEMEENTE DIe BURG

Christus in my en ons in die wêreld

VAKATURE: MEDELERAAR

Gemeenteprofiel:

Fokusareas: Skrifgegronde liggaamsmodel gemeentewees, dissipelskap, diensleierskap.

Gemeenskapsgeöriënteerde kerkwees.

Verdere vars uitdrukkings van kerkwees.

Om God se konkrete familie vir mense te wees.

Die hele evangelie vir die hele mens, vir die hele wêreld.

Fokusareas: Alle fassette van gemeentewerk (Artikel 9 van die Kerkorde).

Spesifiek verantwoordelik (en aanspreeklik) vir die oorhoofse bestuur en Skrifgegronde bediening van kinders/kleuters, die jeug, jong werkendes en ongetroude/getroude lidmate jonger as dertig (30) jaar (insluitend kategese).

Fokus op die bemagtiging van families.

Begeleiding van uitreikgroepe.

Leraarsprofiel: Dinamiese gelegitimeerde, hoogstens 45 jaar oud, wat oor bedieningservaring beskik.

’n Persoon van deurleefde spiritualiteit.

Talentvolle prediker – fokus op eredienste en suiwer Woordverkondiging.

Sterk pastorale ingesteldheid – fokus op persoonlike kontak met alle gemeentelede.

Sterk leierseienskappe, kreatief, georganiseerd, goeie kommunikasievermoë, goeie verhoudingsvaardighede, entoesiastiese

motiveerder, energieke werker, vermoë om mense bymekaar te bring, probleemoplossing, kan multi-taak, selfdissipline,

deursettingsvermoë, aanpasbaar en onbesproke integriteit.

Roepingsbewustheid vir bediening van ’n jonger geloofsgemeenskap

’n Mens-mens met kennis van en aanvoeling vir die behoeftes van lidmate van alle ouderdomsgroepe.

Vermoë om onafhanklik en binne spanverband effektief te werk.

Bewese rekenaargeletterdheid.

Insig/vaardig in praktiese gebruik van sosiale media-platforms netwerke.

Sterk administratiewe en multi-media vaardighede.

Musikale vaardigheid dien as sterk aanbeveling.

Vergoeding: Volgens Wes-en-Suid-Kaap Sinodale riglyne, insluitend huisvesting.

Aansoeke: Aansoeke moet vergesel wees van ’n omvattende CV asook die volledige name en kontaknommers van minstens twee (2)

resente referente.

Aansoeke moet vertroulik gemerk en gerig word aan: Voorsitter: Kerkraad

Kortlys-kandidate sal aan ’n professionele/gestruktureerde keuringsproses onderwerp word. Sodanige kandidate moet vir

onderhoude beskikbaar wees op ’n datum, tyd en plek soos deur die keuringspaneel bepaal. Die proses kan psigometriese

toetsing en praktiese evaluering insluit.

Sluitingsdatum: 26 Februarie 2015 om middernag.

Diensaanvaarding: So spoedig moontlik in oorleg met die suksesvolle kandidaat.

Die kerkraad behou hom die reg voor om geen aanstelling te maak nie.

Nou ja, liewe gemeente van Die Burg, ek sal maar liewer nie aansoek doen nie… Ek sou die meeste van daardie dinge kon doen, maar nie alles nie.
Een mens, wat met almal in die gemeente persoonlike verhoudinge het- van die wieg tot aan die graf met almal oor die weg kom en bedien. Jeugbediening tot bejaardesorg. Sterk admin, sterk musiek, sterk sendinghart, sterk rekenaarvaardig… watter gawe is daar in die kerk wat julle nie van hierdie een mens verwag nie?

En… ek is ouer as 45, die nuwe ouderdom in die Kerkbode se advertensies waar dominees asb weggeraap moet word. DIe ouderdom wat ‘n dominee geen nut meer het vir ‘n gemeente nie.

Maar ek bid regtig vir die arme mens wat dalk wel daardie aanstelling sou kry…

Ek dink ek gaan so Desember rond soos ‘n boemelaar aantrek, en aan hierdie broer/ suster se voordeur kom klop. Ek wil regtig daardie persoon ontmoet wat presies inpas by hierdie advertensie. Dalk by die medeleraar ook, hy/ sy kan seker nie minder superGabriël wees nie…

Die Aartsengel Gabriël soos gevind by http://www.devinemiracles.com/How-To-Meet-Angels.html

Die Aartsengel Gabriël soos gevind by http://www.devinemiracles.com/How-To-Meet-Angels.html

Soms, net soms wonder ek of daar nog ‘n gemeente is wat dalk net ‘n leraar soek wat lief vir die Here, en vir mense is…

Wat sou ‘n mens alles kon doen…?

As jy nooit bang was vir mislukking nie?

As jy nooit die ervaring gehad het dat jy gesig eerste in die modder val nie?

As al jou foute langs die pad leerervarings was om dit volgende keer beter te kan doen?

Dis die tipe vrae wat hierdie middeljarige Donkie besig hou op die oomblik.

Die kerk se finansiële posisie laat mens soms in die nag wakker word, en wonder: wat anders kan ek doen om vir my gesin te sorg?  Wat moet ek maak as ek die dag my werk verloor, en vir niks anders opgelei is nie?

Ek het 8 jaar se universiteitsopleiding om vir 1 “firma” te werk. Daardie “Firma” het skynbaar steeds te veel personeel en te min vakatures.

Ek kyk op die oomblik na ‘n advertensie in Die Kerkbode. ‘n Groot gemeente in die stad is op soek na iemand om daardie stukkie bediening te kom doen waarin ek ‘n Meestersgraad het.  Hulle spesialiseer duidelik daar in elkeen se gawerigtings.  Die gemeente lyk regtig indrukwekkend op hulle webwerf! Daar is lewe, daar is groei, hulle maak ‘n verskil!

Ek kyk na die advertensie. Ek hoor ‘n roepstem. Maar ek is bang. Ek is nou 20 jaar op die platteland. Hier spesialiseer ons nie- hier doen ons sommer alles self.  Omdat ons so by alles betrokke is, is ‘n mens later regtig “Jack of all trades, Master of none…”

Ek probeer myself indink hoe dit moet wees om in my belangstellingsveld te kan spesialiseer. Daar is ‘n reuse honger in my om dit te doen. Maar iets hou my terug. Sê nou maar net… sê nou maar ek het nie genoeg om hulle te bied nie. Sê dit nou maar: sê nou ek is nie goed genoeg vir die grênd stadsmense nie? Sê nou maar ek pas nie in nie?

Ek wens ek het geweet hoe om daardie tipes gedagtes te kon nek omdraai. Ek wens ek kon met groter selfvertroue enige iets aanpak, en sonder twyfel klaarmaak daarmee.

Die afgelope paar maande was weer ‘n steil leerkurwe in my lewe. My gesondheid het my die eerste keer begin dwing om radikaal anders te begin dink aan eet, en nou oefen ook. Ek word geforseer om gesonder te leef. Ek gaan dit gebruik as springplank om so fiks as moontlik ook te word, as ek net hierdie lastige kopverkoue oorwin kry.

Al die vrae in my gemoed oor my huidige posisie laat my wonder: Hoe kan ek in elk geval beter doen waar ek nou is- wat kan ek anders, meer effektief doen om ‘n groter bydrae te lewer tot my huidige beroep.  Ek het ‘n al groter wordende behoefte om te ervaar wat ek doen, maak ‘n verskil.  Ek wil so graag beter doen…

En soos een van my blog vriendinne aanstuur: Miskien wil ek ook weer vir ‘n slag ‘n sexy ass hê!

Vieruur in die more

Is die wêreld maar ‘n donker plek!

In Lynnwoodweg skree die alarms. Motors waar daar ingebreek word. Polisie wat die kapers jaag. Ambulanse wat die beseerdes na die Wilgers hospitaal toe jaag…

Ek is in Pretoria vir die kerk se Lentekonferensie. Die tema is iets in die lyn van “Hoop in tye  van Wanhoop…”

Gister middag se laaste sessie het ons in ‘n werkswinkel gekyk na Nelson Mandela se toespraak voor die Algemene Sinode van 1994, kort na hy President geword het. Hy het verskoning gemaak vir sy Afrikaanse uitspraak, en tog die moeite gedoen om sy hele toespraak in Afrikaans te doen. Hy het gesé ons almal is welkom in hierdie land. Hy het die kerk gevra om te help om die nuwe Suid Afrika op te bou. Het ons? 

Johan v.d. Merwe het Tim du Plessis aangehaal wat gesê het party menwe het geëmigreer. Party het gewens hulle het geëmigreer. En party het na binne geëmigreer. En nie een van die groepe is deel van die oplossing hier nie… Ek het nie ‘n enkele woord gesê in die werkswinkel nie. Dis nie jy nie Johan, ek was skaam…

Ek het ook ingeskryf vir Elize Morkel se werkswinkel oor die geregtigheid vir vroue in ons land.  Dit is skrikwekkend hoe paternalisties ons samelewing in die breë is, en hoe moeilik dit die lewe vir vroue maak omhulle volle potensiaal uit te leef. Ons het so grootgeword, en soma is ek ook skuldig daaraan. Dis waar Elize mens so uitdaag om vars en nuut te dink. Hoekom is daar so min by hierdie werkswinkel? Waarvoor is ons bang?  Soos altyd wil die Donkie so graag deel van die oplossing wees vir die seer van vroue, en nie deel van die probleem nie. Ek kry dit nie altyd reg nie- jammer!

Ons het ‘n verantwoordelikheid en ‘n rol om te speel, hier en nou…

Dis half vyf in Lynnwoodweg. Die voëltjies sing en die horison word rooi…

Na groot sukses… die Besembos…

Ons het toe die naweek ‘n baie suksesvolle Fees gehad- lees: Kerkbasaar… Ons het ons teiken bereik. EN daar is nog ‘n hele klomp vleis oor, amper ‘n halwe lorrievrag vol. Die mense wat dit graag wil koop, begin ook opdaag. Dit lyk al hoe meer suksesvol..

En ek? Ek voel soos Elia nadat hy die Baälpriesters verower het met die vuur uit die hemel. Die volgende dag tref ‘n mens hom aan in die woestyn, onder ‘n besembos, besig om te wens die engel wil hom maar kom haal…  (1 Konings 18 as jy dit graag self wil gaan lees. Ek google dit en kom toe af op: https://bileamsedonkie.wordpress.com/2012/05/28/elia-en-die-besembos/) Lyk my ek was al voorheen hier…

Na groot suksesse, waarvoor jy maande lank gewerk het, is dit seker maar natuurlik om ‘n dip te vat in jou hêppiness…  Maar toe ek Saterdag tot stilstand kom, toe tref die peste en plae wat ek die hele tyd probeer ignoreer het, my behoorlik.  Verlede Saterdag (week terug) het ‘n tand gebreek wat al lankal tot sy uiterste toe gestop is. Verlede Maandag het ek dit laat trek. En binne enkele dae die ding getref wat hulle van praat as “Dry Socket“- die bindweefsel val uit, en die gat in jou kakebeen bly nie toegroei nie. Met dieselfde simptome as ‘n tandabses. Ek lewe nou al van verlede Maandag af- 9 dae- op baie sterk  pynpille. Wat my kop verskriklik dof maak.  Ek was verlede Donderdag weer by die tandarts, dat sy die Droë Sokkit minder Fo….it kan maak… Maar ek weet nie of ek weer iets verkeerd gedoen het nie, die gat voel presies dieselfde, en nog steeds vreet ek pynpille soos smarties om te leef.  En Wikipedia sê: “The pain may last for seven to forty days.” Oor 40 dae is ek totaal van my trollie af… !  Saam met dit, totaal onverwant, het ek nog ‘n klap griep ook gekry, met ‘n baie seer keel, en duiseligheid daarmee saam.

Met al hierdie pret het ek en my oudste seun verlede Vrydagmiddag in die vrieskamer (minus 18 grade) gehelp om die vleis in die lorrie te pak. En Saterdag middag al die onverkoopte vleis weer terug in die koeltrok, wat ook maar fullblast op my was… ek voel die hele tyd uit op my voete.

Maar die ergste was vir my in die suksesvolle Fees, om vleis aan mense te verkoop.  EK is baie dankbaar vir al die skenkers, en die mense wat so getrou gehelp het om die vleis te verwerk en verpak, en die span wat help verkoop het- dis alles staatmakers wat ‘n mens op kan reken en saam oorlog toe kan vat.

Maar die kliënte!!!  Veral die groot aftreeoord op die bult se inwoners!!!

Ons het ‘n skenking Wildswors gekry, wat in 750 gram pakke verpak is.  Die skenkers het besluit op ‘n baie billike prys-  en dis so in in die advertensies aangedui. R35 per pakkie. Vrydagoggend kry ons nog ‘n skenking van fantastiese wildswors, baie hoë kwaliteit, en dis uiters netjies vakuumverpak en weeg 1.1 kg gemiddeld.  Natuurlik het ons dit so bietjie hoër gemerk.  Die een omie van Luilekkerland kom baie ongeskik daar aan en vra wat kos die wildswors- hy het een van die duurder pakkies wors in die hande. Ek sê vir hom die prys.  Hy betaal dit met ‘n groot gebrom. En binne ‘n minuut voel ek skielik hoe iemand se vinger in my sy pomp van agter af… “Hoekom het jy so vir my gelieg? Jou advertensie sê dan R 35 per pakkie…” Baie ongeskik. Ek probeer verduidelik, maar die belangrike oom wil niks weet nie. Ek strip my moer net daar maar soos altyd kan niemand dit sien nie. Ek sê net baie kalm vir die mense wat die geld werk om vir die oom sy geld terug te gee. Ek sê niks van vierkoffieshierso nie…  Nadat die oom sy geld gekry het, glimlag hy liefies soos iemand wat die lotto gewen het, en sê “Dankie dat jy my gehelp het, Meneer…”   Ek het weggestap en gaan koeldrank koop…

En toe ek terugkom, staan daar nog ‘n egpaartjie van Luilekkerland daar, en betas die varksnitte onbetaamlik.  Hulle het by die eerste moontlike krat vleis vasgesteek, wat toe  die varkrashers is wat oorgebly het nadat ons die drie worsvarke bewerk het. Party mense hou daarvan so… Die antie het niks verder na ons vleis gekyk toe sy afhaak en kliphard teenoor haar man sê: “Kyk hoe vet is hulle vleis, en kyk hoe lelik is dit gesny… ”  Dit het maar net my hele Augustus in beslag geneem, en die res van die vleis is Supergraad Bees en topgehalte vleisvarke teen maklik 30% onder slaghuispryse…  Hoekom mag Dominees nie vir mense met enkele kragwoorde van die terrein af verjaag soos sleg honde nie?

Daar was ‘n paar sulke episodes by die vleis. Die een oom wil weet of daar vark in die boerewors is. Die ander of daar vet in die boerewors is. Die derde of daar genoeg Koljander by die wors is…  Ag liewe blou forklift…

My liefde vir die mensdom het ‘n laagtepunt bereik. Ek is gatvol vir die mensdom. Daarom het ek my kerkkantoor in kennis gestel dat ek nou vir vier dae in die bos gaan wegkruip, waar ek geen mense hoef te sien of mee te praat nie.

Ek het my kamera by my, en wil vir die volgende vier dae net die bome en plante en diere sien en afneem.  Die mens WAS die kroon van die skepping voor die sondeval.

Mense is hel… Jean Paul Sartre

Baie meer die kroon van die skepping...

Baie meer die kroon van die skepping…

Volgende week sal ek weer beter voel en liefies glimlag vir al die mense met hulle pragtige idees.  Ek gaan volgende week weer die oorgrote meerderheid kliënte onthou wat die dag eintlik ‘n groot plesier gemaak het. Ek gaan die oorgrote meerderheid mense onthou wat ordentlike, opgevoede mense is, en dat dit baie lekker is om hulle te ken…

Maar intussen- hoop ek daar beland Donkieknaters in jou Shoprite boerewors, oom Luilekkerland…

Die korrekte aanwending van ‘n Kerktoring…

So ‘n paar jaar gelede was die hel mos nou behoorlik los in die Paarl, toe ‘n onbekende kollega se vrou die kerktoring verag het. Sy het dit ‘n “Falliese Simbool” genoem, kort so duskant die ander “falliese simbool” van die Taalmonument. Kerktorings, het die betrokke Mevrou Dominee gesê, is die duiwel, en moet afgebreek word.

My eie gemeente se kerktoring gaan ‘n mens nouliks ‘n “Falliese simbool” kan noem, al is hy hard en regop.  Maar ons self het nog nie altyd mooi verstaan hoekom die argitek hom so beplan het nie…

Hierdie is onse kerkgebou:

IMG_0555Kyk nou net hoe waardig en regop staan onse kerktoring…

Maar toe het ons begin dink. En gedink. En dieper gedink…  Die een ding wat groot deesdae is, is ‘n Zipline. Kyk, ‘n Foefieslaaid is mos nie veilig nie.  Maar ‘n Zipline is glo veiliger as ‘n Ford.  En so het kollega gedink, terwyl dit nou Saterdag basaar is, en terwyl die plaaslike Zipline mense ons nou gedrop het- (soos in verlede week!) ons gaan dit sommer self doen.

So is al die ingenieurs in die gemeente betrek. Twee kabels is in die stad gaan koop, die een kan 8 ton dra, en die 2e ene kan 3ton dra- die veiligheidskabels. En daar is Ordentlike harnasse gaan koop, dieselfde soort as die professionele Zipliners s’n. Duur goete dié.

En so word die Zipline opgerig op die kerkterrein.  Die 8 ton kabel is in plek vandag. Iemand moet hom toets, hulle kyk na my, maar ek…

So word die dapperes nader getrek:

_MG_0141

 

Sien jy doer bo by ons kerkklok? Dis al amper in die engele se wentelbaan daarso!

Toets 1-

IMG_0169

 

Toets 2-

IMG_0181Sien- gelyke geleenthede…

En dan, net omdat sy haar pa mooi gevra het, en ‘n baie dapper meisie is:

IMG_0192En daar het jy dit, Mevrou Dominee van die Paarl, daar is wel heilige aanwendings vir kerktorings ook…

More kom die veiligheidskabel op, en Saterdag wil ons die Basaar van alle basare probeer hou…  Daardie kabel sal selfs vir my daar bo kan hou- die rit is 90 meter lank…

 

 

 

Opbou na die Kerkbasaar- nie vir sensitiewe kykers nie…

Ernstig- enige vegetariërs en Jode en Moslems gaan aanstoot neem…  Traumatiese beeldmateriaal van vleisverwerking word vertoon…

Jy kyk verder op eie risiko…

Boeddiste sal ook nie hiervan hou nie, dalk is dit gereïnkarneerde familielede…

IS jy nog steeds hier?  Is jy seker? Want selfs ek kry nagmerries van die beeldmateriaal…

Dit raak al hoe moeiliker vir die plattelandse gemeente om te oorleef. Al ons jongmense wat universiteit toe gegaan het, gee een kyk na Julsie Malema se EFF- OFF party, en gaan dadelik Australië en Kanada se ambassades toe op pad na die reisagentskap. Die wat nie universiteit toe gegaan het nie, gaan stede toe, polisie toe. En dié wat nie skool toe gegaan het nie, gaan word karwagte in Pretoria-Wes… Feit van die saak is- ons jongmense bly nie agter op die platteland nie.

Elke jaar raak die plattelandse gemeente se gemiddelde ouderdom ‘n bietjie ouer. Elke jaar raak die kerkgebou ‘n bietjie meer leeg…

Elke jaar raak die druk op die leraars egter ‘n bietjie groter: Dominee- jy moet meer huisbesoek doen, dat die mense meer kan gee. Dominee, jy moet mooier preek. Dominee- die basaar beter goed doen…  anders is die wolf voor die deur…

Dominee voel die druk maar alte goed. Dominee probeer elke jaar ‘n bietjie harder.  Maar dit gebeur in ‘n tyd wat die tradisionele kerke al hoe meer onbelangrik word vir mense.  As die ANC klaar is met hulle belasting, is daar in elk geval ook maar min geldjies oor vir die kerk.

Maar daar is darem vreugdes ook. Daar is steeds ‘n klomp mense wat regtig wil help, en ‘n verskil wil maak.

Ons is so dankbaar vir elke boer in ons gemeente wat ietsie gee vir die Basaar.  En so is daar vanjaar 23 varke en 10 beeste aangebied vir die Basaar.  Daardie beeste stap nie net in netjiese verpakte pakkies skoon, higiëniese vleis in nie. Iemand moet hulle daar kry.

Gelukkig is daar ‘n getroue span staatmakers wat my vanjaar weer kom help het.  Ons het die taak aangepak, en in ses dae in die sweet van ons aangesig die werk gedoen.

IMG_0512

Vleisverwerking is baie afhanklik van ‘n goeie blokman. Dit is iemand wat die diere se anatomie baie goed ken, en weet hoe om bemarkbare, netjiese snitte vleis te maak. Verkieslik het die blokman nog al tien vingers wat aan hom ge-issue is oor…  Ons het so ‘n deeglike ou-skool blokman, wat elke snit baie netjies doen. Dis nie so vanselfsprekend nie, ‘n paar jaar gelede het ons buite op ‘n plaas gewerk, en die manne toe het ‘n hele paar moutsappies per dag geneem, en die snitte het al hoe dikker en skewer geword soos die Boeings oorgevlieg het…

Deesdae werk ons in ‘n goed toegeruste industriële slaghuis soos op die fotos gesien kan word. Ons dra haarnette, want ek hou nie van iemand se hare in my vleis nie.

Soos die blokman die snitte sny, moet die vleis mooi skoongekrap en dan verpak word.

Daarvoor het jy gewillige hande nodig.

IMG_0516

IMG_0519

So langs die tafel word baie gesels oor die lewe, die herinneringe. en al derglike dinge. Maar teen die middag se kant begin die mense ook maar moeg word…

IMG_0515

Soms wil-wil die humeure ook maar opvlam. Soms moet ‘n mens maar baie geduldig wees soos Moses, wanneer die volk in die woestyn gemurmureer het. Party  mense hou van murmureer…

En dan kom die einde nader- nou moet van al die minder aangename stukke ontslae geraak word. Daar is ‘n geweldige groot mark vir die benevleis. en varkkoppe… (Nou moet sensitiewe kykers regtig aanbeweeg na Rolbos of Maankind toe…)

Ek het mos drie keer gewaarsku... selfs ek kry nagmerries deesdae....

Ek het mos drie keer gewaarsku… selfs ek kry nagmerries deesdae….

Al ons vleis is nou gereed in die groot vrieskamer vir 7 September.

Waar gaan jy nog supergraad maalvleis vir R40 per kilo kry?

Boerewors wat regtig net vleis en speserye in het, geen soja of broodkrummels of meel of donkietestikels nie… vir R45 per kilo?

(Dis hoekom ek dit so verloor het toe iemand op die vloer gesê het sy gaan koop eerder by die buurgemeente vleis, ons buit die mense uit wanneer ons osstert teen R75 per kilo verkoop- daar is net 5)

Diep in die Donkie se hart is daar tog maar groot liefde vir die mense in die plattelandse gemeente- soos by Rolbos is daar baie liefde en omgee, en soms vashaak en baklei.

Maar met sulke mense kan ‘n mens nog probeer om die Koninkryk vir nog ‘n jaar sigbaar te probeer maak op die platteland.

Ag, kom ek sluit maar af met ‘n stukkie hoop- daar gaan biltong wees teen R150 per kilo- en dis MOOI biltonge…

7 September in Nylstoom- dan is dit die Fees van feeste…  En nou gaan ek rus…

IMG_0510

Oom Barrie se Bybel

Ons dominees se werk is nou nie altyd maanskyn en rose nie. Partymaal kan ons ook maar murmereer soos die Israeliete van ouds in die woestyn.

Maar soms het ons ook met wonderlike oomblikke te doen.

Een van die mense wat my baie diep aangeraak het met sy menswees, was oom Barrie Barnard gewees. Oom Barrie het baie gekrimp met die jare, hier teen die einde was hy baie kort gewees. Maar ‘n man van groot statuur in die gemeenskap. Oom Barrie was baie lief vir die Here gewees. En hy het vir lank gesit en skrywe in die aande. Sommer baie van daardie eksamenblokke vol geskryf met sy vulpen.

Elke keer as ek hom gaan besoek het, het die besoek nog meer vir my beteken as vir hom Hy was een van daardie mense wat altyd vriendelik was, en nooit gekla het nie, selfs as die gesondheid baie pla. Oom Barrie kon ook later nie meer hoor nie. Maar sy oë het altyd geblink as mense met hom praat, hy was baie lief vir mense. Oom Barrie is so twee jaar gelede oorlede, toe hy al goed in die negentigs gevorder het.

Sy weduwee, tannie Rachie, is net so ‘n kosbare mens. Sy is vol liefde teenoor almal, en sy is altyd vrolik. So sê sy ek moet bietjie vir haar kom kuier, sy wil graag vir my iets wys. Vanoggend na die Bybelstudie maak ek toe ook so.

Hulle seun Gerhard, ‘n leraar van die Kaap, het al die geskrewe eksamenblokke geneem, en dit baie professioneel laat bind.  Die geskryf was toe al die tyd die hele Bybel, wat oom Barrie woord vir woord oorgeskryf het met sy vulpen. Alles so netjies, soos oud-onderwysers soms maar maak…  Ek het toestemming gevra, en oom Barrie se Bybel met my selfoon afgeneem. Gerhard leen vir sy ma die Nuwe Testament, die ou Testament is glo in nog drie sulke volumes gebind.

So lyk oom Barrie se Bybel:

20130723_10405320130723_104101

 

20130723_104036Die woorde van Matteus 1:1, en so gaan die hele nuwe Testament handgeskrewe voort tot aan die einde van Openbaring 21. En daarna die wonderlike kort gebed:

20130723_104146” Dankie Here vir die genade aan my om die skryfwerk en studie te kon voltooi” en geteken L. G. Barnard

Dit is ‘n kosbare nalatenskap vir sy familie, en ek is so bly Gerhard het hierdie potensiaal raakgesien in die hope ou eksamenblokke.  Dit was vir my aangrypend mooi, en dit is vir tannie Rachie net so kosbaar om dit met my te kon deel.

20130723_104158

 

Oom Barrie se getuienis was soos Psalm 119:103 sê: “Hoe aangenaam is u woord, soeter as heuning in die mond.”

 

 

Die Boemelaar

Vanaand wil ek nou eers weer ietsie van my hart afkry, in Afrikaans, onder ons mense wat verstaan… 

Dit is skemer. By my palisade hek voor in die tuin het ek ‘n koeiklok opgehang. Gewoonlik as daardie klok lui, is daar… moeilikheid in Kanaän. Daardie klok lui gewoonlik Vrydagaande, maar dan hoor ek hom nie by my braaiplek nie. Njannies Koepêla. 

Vandag het ek so ‘n klompie besoeke afgelê. Ietsie is besig om te broei in my liggaam. Ek voel pap en moeg. Sal maar nie al die simptome beskryf nie, daar mag dalk net sensitiewe kykers wees onder ons… 

In elk geval, die klok word meteens woes heen en weer gepluk. Dit klink soos wanneer ‘n hondsdol hyena ‘n kalf aan die agterpoot beet het, en die kalf woes spartel en spook… 

Ek slaan my oë op na die voorhekkie toe, terwyl die son se laaste strale saggies speel oor die winterblare, en die koue nader sluip.  My moed sak in my skoene… dit is weer… ‘n boemelaar… 

Foto geleen by toquoteamockingbird.wordpress.com

Daar is iets geheimsinnigs aan die N1 roete, van Messina tot by Kaapstad. Ek hoor dit by al my predikant en pastoor maatjies langs die pad.  Die manne is weer aan die trêwwel.  Dis koud in die aande. 

Vanaand s’n stel hom plegtig voor, met ‘n handdruk. Soos al die ander sê hy dadelik: Dominee, ek is nie ‘n boemelaar nie… Hoe het hy geweet ek is ‘n dominee… o ja- rocket science, ek bly op die kerkterrein…

Dan volg Die Storie.  En Die Storie het ek al hoeveel keer in al sy gedaantes gehoor… 

Hierdie hartseer individu was êrens naby Messina in ‘n motorongeluk gewees. Sy kar is afgeskryf, en sy dogtertjie is dood in die ongeluk. Toe los sy meisie hom. Toe haaik hy maar Suidwaarts. In Pietersburg is hy aangeval deur Zimbabwiers, hulle het hom met ‘n baksteen oor die kop geslaan en met ‘n mes in sy arm gesteek.  Dit het hom vyf dae in die hospitaal besorg.  En nou het hy sy werk in Upington verloor, want hy is al ‘n week laat om aan te meld daar… 

Maar Dominee, het jy nie vir my iets om te eet nie… Weet jy broer, vanaand is daar op my spyskaart bruinbrood en weense worsies. Dis wat ons ook gehad het. Payday is nog ver, en ons was self die slagoffers van misdaad (my dogter se kar wat gesmash en grab is)… Ek kan net vir jou gee wat ons ook het. Brood en weense worsies. 

Dominee, maar dit is baie koud, het jy nie vir my ‘n kombers nie… Nee, almal is uitgedeel wat ek hier gehad het, daar is net dié oor wat op my kinders se bed is. As ek vir jou gee, slaap my kind koud vanaand. 

Dominee, het jy nie dalk vir my ‘n baadjie nie… 

En so word die eise al hoe groter en groter… 

Dominee, kan jy nie dalk help met geld tot in Upington nie…  

Ek het vir die broer van die langpad kos gegee vanaand. Dieselfde as wat ek geëet het.  Ek het vanaand niks meer om vir hom te gee nie. 

Maar ek sit nou en wonder oor ‘n paar dinge soos altyd. Jesus het in Matteus 25 gesê dit wat ons vir die minstes gedoen het, het ons vir Hom gedoen.  Hy was honger, en ons het Hom nie kos gegee nie, Hy was naak en ons het Hom nie klere gegee nie…   Sommiges het al engele gehuisves deurdat hulle gasvry was teenoor die vreemdeling in hulle poorte… 

Maar die broers van die langpad weet dit ook… Ons kerk is van die hoofpad af.  Hy is nie opsigtelik van die paaie deur ons dorp nie.  Hy stap langs drie kerke langs die pad verby na my huis toe. 

Ek het regtig nie meer geld oor tot betaaldag nie.  Dis nie eers einde van die maand Salticrax hier in ons huis nie.  Ek het regtig nie meer ou klere oor om weg te gee nie. Ek het niks meer ekstra komberse oor nie.   En daar kom letterlik tientalle van hierdie soort van my naaste na my huis toe… 

Die broer is baie ontevrede by my huis weg. Hy sê smalend mag die Here my en my gemeente seën…  Hy dink hy moet homself nou maar gaan ophang, want hy het nie meer ‘n mammie en ‘n pappie nie, sy kindjie is dood, sy beursie is weg, sy ID is weg, hy het sy werk verloor, alles wat hy besit is in die geel Shoprite sakkie by hom, en niemand gee meer om nie… 

Ek kan ook vir julle vertel van die florerende besigheid by die taxi rank in komberse en tweedehandse baadjies. en die ridders van die langpad wat baie graag by Tamsen se Bottelstoor opdaag… 

Maar… Koos Kombuis was ook ‘n boemelaar… 

 

 

 

 

 

 

‘n Harde week van grondpad ry… Gatvol blog, moenie lees nie…

Hierdie week is hopelik nou amper verby. Ek het lanklaas in my lewe so ‘n uiters moeilike week beleef soos hierdie een.

Dit het begin met die begrafnis van ‘n man in ons gemeente verlede Saterdag oggend. Ek en hierdie man het mekaar verstaan- ons albei het van motorfietse gehou, ons het dieselfde smaak in boeke en musiek gehad.  Dit is nie lekker om mense te begrawe nie.

Nog ‘n man in ons gemeente het die nuus gehoor dat sy kanker nou na sy longe en lewer toe versprei het, en die dokters praat van 6 weke lewe wat oor is.

Ek het gisteroggend ‘n jong moeder op ‘n plaas in die Bosveld begrawe.   En al is dit die mooiste setting waar ‘n mens begrawe kan lê, sou ek haar soveel eerder in haar kinders se arms lewendig tuis wou sien! 2013-06-21 12.28.01

Al bogenoemde dinge was erg om te beleef in dieselfde week. Maar in al daardie gevalle kon ek voel ek help mense, dat ek daar was vir iemand in nood, en net die seer van mense so klein bietjie kon help dra…

Maar waar ek dit verloor het hierdie week, was by die Ringsitting.  Ons het Dinsdag as leraars informeel bymekaar gekom. Dit was lekker. Maar Woensdag saam met die kerkraadslede in die formele vergadering…   Dit het vir my ‘n baie slegte ervaring geword. Ek wil nie baie oor die inhoud van my ongemak uitbrei nie. Ek dink net die kerk se hantering van proponente stink. en ek is jammer dat hulle dit moet beleef in die “meerdere vergaderings”.  Ek is so moeg vir die institusionele kant van die kerk, waar alles so ordelik en netjies volgens vergaderingsprosedure moet geskied. En goeie dinge wat ‘n reuse verskil kan maak, sommer met ‘n ordemosie van die tafel af gevee kan word, of uitgestel word na volgende jaar se ringsitting toe… Ja, die ringskommissie gaan intussen daarna kyk, die betrokkenes gaan saam vergader (en ek is nie een van die betrokkenes hier nie…) Die boodskap wat uitgedra is teenoor die jongste lid van die vergadering is: Ons gee eintlik nie ‘n hel om nie.   Al kan ons dit met sulke mooi woorde probeer sê. Dan wonder ons hoekom  die tradisionele kerk op pad uit is…  Die klokke lui al lankal, die pasiënt is in ICU, maar ons gaan rustig voort, die Kerkorde sal ons mos beskerm teen die Chaos…

En toe ek terugkom van die RIngsitting, kry ek die epos van die verslag van die Emosionele Intelligensietoets wat ek moes aflê voor my prekie in die Kaap. En dié toets het ek duidelik gedop. Ek het vroeër die week dit vir ‘n aand op die blog gehad, maar weer uitgevee. Die toets het net ‘n klomp ou wonde in my hart weer kom oopkrap.  Daar is ‘n hele paar dinge wat ek weet waarmee ek sukkel in die bediening. Ek het oor jare baie werk daarvan gemaak.  Nou kom ‘n EI toets, en vra 104 vragies- watter een is die meeste jy, watter een is die minste jy?  Daar is nog steeds dinge wat ek meer van hou as ander dinge. Daar is sekere vrae wat glad nie ek is nie, maar ek moet kies en een meeste en een minste werk. Die uitslae kom genadeloos- as ek na die resultate kyk, sou ek myself nie eers wou huur nie.  Geen leierskap potensiaal nie. Druk nie deur met projekte nie. Kan nie aanpas nie. Luister wel goed na mense…  My interpretasie: ‘n regte slapgat…   Ek beleef dat daardie toets my finaal sou gesink het in die beroepingsproses.  Maar ek het gebid dat die regte ding sou gebeur- ek weet nou dat hierdie beroep nie vir my beskore was nie. Maar daardie verslaggie sink my hierdie week in die donker dieptes in.  Ek hou nie van leiding neem nie, dit is waar. Maar ek dink ek kan.  Ek voel nie altyd daarna om deur te druk met iets nie. Maar ek dink my track record sê anders…  Ek was nog nooit goed met Emosionele Intelligensie toetse nie…

Die een ding wat ek weer baie oor wonder, is die aanhaling wat Stephan Joubert eendag gemaak het, en ek kan nie onthou wie dit oorspronklik geskryf het nie- ‘n Man het in die verre Ooste die verskillende godsdienste gaan bestudeer. En dié persoon het die opmerking gemaak: “Every time I see a Buddist priest, I see a holy man. But every time I see a Christian pastor, I see a manager…”

Dit, liewe vriende, is die punt van hierdie gerammel wat ek net van my bors af wil kry, en more dalk weer ‘n keer gaan uitvee. Ek is nie ‘n goeie bestuurder nie. Ek hoef ook nie te wees nie. Paulus het gesê die Ouderlinge is immers die bestuurders van die huishouding van God.  Ek doen my werk omdat ek graag vir mense wil omgee, en saam met hulle ‘n pad wil stap.  My verstaan van die kerk is dalk anders as wat al die gemeentes wat beroepe in die Kerkbode adverteer, wil hê.  Ek wil vir die Here lief wees, en vir mense lief wees. Soos die oorspronklike roeping wat die Here my mee geroep het om in sy diens te staan.  Dis wie ek is- ek het jare lank daarteen baklei, maar ek is nou moeg vir die stryd in myself. Ek gaan nou maar aanvaar wie ek is, en myself ten volle uitleef in dit wat die Here wel vir my gegee het om mee te werk.

Ek hoop volgende week lyk beter!

Ek hoop nie jy het toe hierdie gemors gelees nie!

Die Gatvol Donkie…