Geloof en hoop…

Ek is op hierdie oomblik tussen twee begrafnisse (eintlik troosdienste…) Ek het vanoggend ‘n dame van 87 se troosdiens gelei, en more oggend is ‘n ander dame van 93 se troosdiens. Beide hierdie dienste word maar deur bitter min mense bygewoon, anderkant 80 oorleef ‘n mens gewoonlik al jou eie geslag familie en vriende, lyk dit my. En dit is hartseer- as iemand so lank voluit gelewe het, maar vir drie jaar in die bed was vanweë beroertes en ander siektes, en so min mense is daar om totsiens te kom sê.

Ek het Vrydag, ‘n uur voor die een dame saggies heen is, by haar sterfbed gesit. Sy is so saggies heen, sonder enige pyn of vrees, dat dit eintlik baie mooi was. Die afsluiting van ‘n aardse lewe.

Vir albei hierdie dienste het Paulus maar baie met my gepraat- vanoggend se diens was oor Romeine 8:37-39, waar ons die troos kry dat elkeen van die Here se kinders meer as oorwinnaars is, en dat selfs die dood ons nie weer sal skei van sy liefde nie. En more sal dit gaan oor Romeine 5:1- die vrede wat daar nou reeds tussen God en sy kinders is, wat selfs vir ons nuwe perspektiewe op lyding bring.

Baie mense wonder hoe ons dominees ‘n begrafnisdiens emosioneel oorleef. Veral more s’n gaan moeilik wees, want ek het die dame al 18 jaar lank geken, kinders van haar getrou, ek probeer onthou of ek kleinkinders gedoop het. Daar was baie kere se kuier om die kombuistafel rondom koffie en beskuit en die Woord.

Maar nee, begrafnisse is nie so erg nie. In ‘n sekere sin is daar ‘n stuk egtheid en eerlikheid daarin vir my. Nee, ek kan nie van almal vertel watter wonderlike mense hulle was, as dit nie waar is nie. Maar op so ‘n diens is mense se maskers af. Jy sien wie hulle werklik is, waarop hulle hulle lewens bou, wat die hoop in hulle lewe is. By ‘n begrafnis word ‘n mens gekonfronteer met jou eie sterflikheid. Elkeen van ons het maar ‘n afsprakie met die doodsengel êrens eendag. Dit laat ons vra of die stuk van ons eie pad wat ons al afgelê het, die moeite werd was. Prioriteite word geweeg. Was dit so belangrik om ryk te word, die regte adres en motor te besit? Of het ek vandag die vreugde in my lewe van verhoudings wat regtig ‘n verskil maak- met my lewensmaat/ kinders/ vriende?

Ek dink mos maar dis die vraag van die oordeelsdag: Het jy liefgehad?

Maar ek wou eintlik net hierdie enetjie met julle deel, want dit het so baie beteken vir my en die mense van vanoggend se diens.
Gister het Leonard Sweet op Twitter ‘n aangrypende ding gesê:

“Hoop is om die musiek van more nou alreeds te hoor. Geloof is om vandag daarop te dans… ”

Mag jou lewe ‘n vrolike dans vandag wees!

Die Donkie

http://pjsroom.com/paintings__sketches
Kyk na PJ se fantastiese skilderye!

Advertisements

3 thoughts on “Geloof en hoop…

  1. “Hoop is om die musiek van more nou alreeds te hoor. Geloof is om vandag daarop te dans… “
    Absolute WOW! ..en kan ons byvoeg….liefde is die ritme wat dit bymekaarbring…

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Verander )

Twitter picture

Jy lewer kommentaar met jou rekening by Twitter. Log Out / Verander )

Facebook photo

Jy lewer kommentaar met jou rekening by Facebook. Log Out / Verander )

Google+ photo

Jy lewer kommentaar met jou rekening by Google+. Log Out / Verander )

Connecting to %s